Det siste året har Legria vore engasjert i fleire viktige prosjekt i Etne, Åkrafjorden og Sveio. Det største prosjektet bedrifta har leia i 2024–2025 er utbygginga av Langfosstien i Åkrafjorden. Me er stolte over å bidra til utvikling, bevaring og nye moglegheiter i lokalsamfunna våre.
Langfosstien – eit tryggare turmål
Langfosstien i Åkrafjorden er eit svært populært turmål i regionen. Tusenvis av turistar går kvart år opp til utsiktspunktet ved den mektige fossen. For å gjera opplevinga tryggare og meir tilgjengeleg, er sherpaer frå Nepal i gang med å leggja solide steintrapper og utsiktspunkt. Prosjektet, som Legria har prosjektleiinga for, har fått brei støtte frå sparebankstiftingar, Olav Thon-stiftinga og fleire lokale aktørar.
Arbeidet er omfattande og krev både helikoptertransport og stenging av stien i periodar, men når det står ferdig, vil stien stå fram både trygg og vakker – godt tilpassa naturen. Når byggesesongen blir avslutta 23. august 2025, er 600 steintrapper på plass. Dette tilsvarar 440 lengdemeter med trapper og forsterka sti frå E134 og opp til utsiktspunktet 348 meter over Åkrafjorden. Totalt er 11,4 millionar kroner investert i prosjektet. Det står att arbeid for 3–4 millionar kroner til ferdigstilling i 2026.
Turstiprosjektet i Sveio – den største satsinga i kommunen si historie
I Sveio er Legria engasjert av kommunen til å organisera og planleggja det største turstiprosjektet i kommunen si historie. Det blir bygd 18,7 kilometer med nye stiar, klopper og trasear frå Auklandshamn til Haukås. Dette prosjektet er eit resultat av samarbeid mellom kommunen og tre bygdelag, og byggjer på innsats frå frivillige.
I april vart 6.877 meter med plankar frakta ut med helikopter – i opptil 14 turar i timen! Prosjektet vil gje eit løft til friluftslivet på heile Haugalandet.
Restaurering av kulturminne i Åkrafjorden
Legria er òg involvert i viktige restaureringsprosjekt i Åkrafjorden. Det gamle sagbruket på Djuve og eit bustadhus frå 1700-talet på Glåmo vil bli sikra for framtida. Vår rolle er å hjelpa prosjekta med finansiering og gjennomføring.
Bustadutvikling i Etne sentrum
Som prosjektleiar for Forbruken AS er Legria med på planane om å byggja to nye bustadbygg i den eldste delen av Etne sentrum, der Etne Forbruksforening tidlegare hadde butikklokale. Byggjestart er planlagd til 2026, avhengig av ferdigstilling av reguleringsplanen for kaiområdet.
Kontortenester
Leif Strand har vore ein del av Legria sidan 2017 og leverer viktige kontortenester til mange av våre kundar. Han er ein stødig kapasitet som sikrar kontroll og oversikt for både Legria og dei som får hjelp frå han.
Styrearbeid
Leif Grindheim er framleis styresekretær for SØK AS (sidan 2020) og SØK-stiftinga (sidan 2021).